ماہ رمضان ہے ابر باراں

جس طرح رحمت باراں خشک زمینوں کی سرسبزی اور شادابی کاباعث ہوتی ہے اسی طرح ماہ رمضاں مردہ طبیعتوں کو محرک کرتا ہے۔اس ماہ مبارک میں بعض کی طبیعتوںمیںروحانیت کا بیج بویا جاتاہےاورپھروہ وقت کےساتھ ساتھ پروان چڑھتا رہتا ہے۔ کئی روزےداروں میںروحانی زندگی کی رمق پیدا ہو جایا کرتی ہے۔ اور جو انسانی فطرت پہلے سے روحانیت کا نوررکھتی ہیں انکو نور میں اور اضافہ ہوجاتاہے یوں وہ نورعلیٰ نور کے مصداق بن جاتے ہیں ۔اس ماہ مبارک کوسید الرسل ﷺ نے سید الشھور یعنی تمام مہینوں کا سردار قراردیاہے۔ اسکی یہ سرداری اس ماہ کے روحانی فیض کی وجہ سے ہے۔ اور جو اس ماہ کے روزے ایمان اور احتساب کے ساتھ رکھتاہے وہی اصل فاتح اور سید ہے اور گروہ سعید میں شمار کیا جاتاہےکیونکہ و ہ اپنے نفس امارہ کو زیر کرنے میں کامیاب ہوجاتاہے اور نفس امارہ کی سرکوبی ہی ایک حقیقی مومن کا مطمح نظر اور مقصد حیات ہے۔ حضرت مصلح موعودؓ نے کیا خوب فرمایاہے کہ

 تم نے دنیا بھی جو کی فتح تو کچھ بھی نہ کیا

نفس وحشی و جفاکش گر را م نہ ہو

روزوں کی اصل غرض یہی ہے کہ انسان اپنے نفس کو زیر کرے اور اپنے اندر اخلاقی تبدیلی پیداکرے۔ بھوکاپیاسارکھناشریعت اسلامی کامقصد نہیں ۔جو شخص جھوٹ بولنااور جھوٹی کارروائیوں سے باز نہیں آتااس کاروزہ رکھنا عبث اور بے فائدہے۔آج کل بھوک ہڑتال کا عام رواج ہے اور کئی لوگ ہیں کہ کئی کئی دن بھوک ہڑتال پر چلے جاتے ہیں۔ایک روزے دار اس طرح انکا مقابلہ نہیں کرسکتا۔جسطرح اللہ تعالیٰ نے فرمایاہے کہ قربانیوں کا گوشت اورخون خداتعالیٰ تک نہیں پہنچتابلکہ قربانی کرنے والے کی نیت پر ثواب مترتب ہوتاہے اسی طرح روزےدارکی بھوک پیاس اصل مقصو د نہیں ہے بلکہ اصلاح اعمال اور تزکیہ نفس ہے۔

اس ماہ مبارک میں تزکیہ نفوس اور حصول جنت کے بےشمار ذرائع میسر آتے ہیں۔نماز تہجد اور دوسری نوافل کے پڑھنے کا موقع ملتا ہے۔اورنوافل سے خداتعالیٰ کا قرب حاصل ہو جاتا ہے۔ روزے دار کو توبہ واستغفار کاموقعہ ملتاہے۔توبہ کی قبولیت ہی ایک بندے کی حقیقی عید کہلاتی ہے۔کیونکہ ایک بندہ جب اپنے خالق و مالک کو رازی کرلیتاہے تو وہ اپنی مراد کو پہنچ جاتاہے۔ اسی طرح ایک روزے دار کو غرباء کی بھوک اور پیاس کا بھی احساس ہوتاہے اسکے اندر غرباء کے تئیں ہمدردی اورمواسات کے جذبات فروغ پاتےہیں۔یعنی اس ماہ میں حقوق اللہ اور حقوق العباد کی ادئیگی کے بہترین مواقع ہاتھ آتےہیں۔آجکل دنیا میں غرباء اور امراء کے درمیان خلیج گہری ہوتی جارہی ہے۔ کروناوائرس میں بھی امیر اور زیادہ امیر ہوگئے اور غرباء غربت کے بھنور میں پھنستے چلے جارہے ہیں ۔اس طرح امراء اور غرباء کے درمیان دشمنی اور رقابت بڑھنے کے کافی امکان ہیں ۔ان حالات میں رمضان امن کاپیغام لیکر آیاہے کہ امیر اپنے غریب بھائیوں کی ضرورتوں کا بھی خیال رکھیں اور ان پر خرچ کرکے اس دنیا میں سرخ رو ہوں اور آخرت کے ثواب کے بھی حقدا ر ہوں ۔

پاس ہو ما ل تودو اس سے زکوٰۃ وصدقہ

فکر مسکیں رہے تم کو غمِ ایام نہ ہو

 نیاز احمدنائک